١. الصورة: أول شي بيشوفه الزبون
الزبون أونلاين ما فيه يلمس المنتج، فالصورة هي المنتج بالنسبة إله. وما بتحتاج استوديو:
- صوّر بضوء النهار جنب شباك، وبلا فلاش.
- خلفية فاتحة وبسيطة: حيط أبيض أو قماشة سادة بتكفي.
- صورة من قدّام، وصورة للتفاصيل، وصورة للمنتج وهو مستعمل إذا بتقدر.
- نفس الخلفية لكل المنتجات، فبيطلع متجرك مرتّب ومتناسق.
والمتجر بيسمحلك تضيف أكتر من صورة لكل منتج، وصورة لكل لون أو مقاس، فالزبون بيشوف بالضبط شو رح يوصله.
٢. السعر: واضح ومكتوب
أكتر رسالة بتضيّع وقتك هي «قديش السعر؟». لما السعر مكتوب جنب كل منتج، الزبون الجدّي بيطلب مباشرة، واللي بيسأل بس ليتفرّج ما بياخد من وقتك.
- احسب التكلفة كاملة: البضاعة، التغليف، ونصيبك من التوصيل إذا عم تتحمّله.
- قرّر إذا التوصيل على الزبون حسب منطقته، أو مجاني فوق مبلغ معيّن ليشجّع الطلب الأكبر.
- إذا بتسعّر بعملتين، اعرض الليرة وجنبها تقريب الدولار بسعر صرف بتحدده أنت.
- الخصم يكون بكوبون محدد بمدّة، مو بتنزيل السعر كل يومين.
٣. التوصيل: الوعد اللي لازم توفي فيه
الزبون بيسامح بسعر أعلى بشوي، بس ما بيسامح بطلبية تأخرت بدون ما حدا يخبّره. قبل ما تنشر، حدد المناطق اللي بتوصللها ورسم كل وحدة، واتفق مع مندوب أو شركة توصيل. التفاصيل كلها بدليل توصيل الطلبات وتتبّعها.
٤. الدفع: خلّي الزبون يختار
الزبون الجديد بيرتاح للدفع عند الاستلام، والزبون المتكرر بيفضّل يحوّل بشام كاش ويخلص. فعّل الطريقتين إذا بتقدر، وشوف كيف تتأكد من التحويلات بدليل الدفع بشام كاش.
