متجر إلكتروني مجاني في سوريا — تجربة كاملة ٦ أشهر

شو بتشمل التجربة المجانية؟

التجربة مو نسخة مصغّرة. بتفتح متجرك الحقيقي على رابطه، وبتستقبل طلبات حقيقية من زبائن حقيقيين، وكل الأدوات مفتوحة:

• منتجات بصورها وأسعارها، مع مقاسات وألوان لكل قطعة ومعرض صور لكل منتج.
• استيراد منتجاتك دفعة وحدة من ملف إكسل إذا عندك قائمة جاهزة.
• الدفع عند الاستلام، وشام كاش والمحافظ مع إيصال التحويل.
• مناطق توصيل برسومها، وتوصيل مجاني فوق مبلغ بتحدده.
• كوبونات خصم، وتقييمات زبائن، وتذكير السلات المتروكة.
• تحليلات بتقلك شو عم ينباع ومين عم يزور متجرك.
• تتبّع الطلب لزبونك برقم الطلب وجواله.

كيف بتبلّش؟

التسجيل بياخد دقائق: اسمك ورقم جوالك وكلمة مرور، واسم متجرك والرابط اللي بدك ياه. بيوصلك رمز تحقق على الجوال، بتكتبه، وبتدخل على لوحتك مباشرة. ما في بريد إلكتروني لازم، وما في بطاقة، وما في شي بيتقطع منك تلقائيًا بآخر التجربة.

شو تجهّز قبل ما تسجّل؟

التسجيل نفسه دقائق، بس التجربة بتمشي أسرع إذا جهّزت شوية أشياء قبل:

• اسم متجرك والرابط اللي بدك ياه، قصير وسهل ينقرا ويتكتب.
• شعار بسيط، ولو كان اسم المحل بخط واضح.
• صور لأول ٢٠ منتج، وأسعارهم النهائية.
• رقم محفظة شام كاش إذا بدك تقبل دفع مسبق.
• المناطق اللي بتوصللها ورسم كل وحدة.

ما في شي من هدول لازم يكون كامل بأول يوم. فيك تفتح المتجر اليوم، وتكمّل الباقي على مهلك، والتجربة بتضل شغّالة كل الـ٦ أشهر.

كيف تستغل الـ٦ أشهر صح؟

كتير تجار بيفتحوا المتجر وبينسوه، وبعد ٦ أشهر بيقولوا «ما مشي الحال». التجربة بتفيدك بس إذا اشتغلت عليها. هاي خطة بسيطة:

الشهر الأول: جهّز وانشر

ضيف أهم ٢٠ أو ٣٠ منتج عندك بصور منيحة وأسعار واضحة، واضبط التوصيل وطرق الدفع. بعدها حط الرابط بالبايو وابعته لزبائنك الحاليين على واتساب. هدول أول ناس رح يطلبوا.

الشهر التاني والتالت: راقب وحسّن

افتح التحليلات كل أسبوع: شو أكتر منتج عم ينشاف؟ شو عم ينباع؟ مين حط بالسلة وما كمّل؟ ذكّر أصحاب السلات المتروكة، وجرّب كوبون خصم لأول طلب.

آخر ٣ أشهر: قرّر بالأرقام

قبل ما تخلص التجربة، بتكون عارف كم طلب إجاك من المتجر، وقديش وفّر عليك من وقت الرسائل. وقتها بتقرر إذا بدك تكمّل، والقرار مبني على أرقامك إنت مو على وعود.

وبعد التجربة؟ الباقات والأسعار

لما تخلص الـ٦ أشهر، بتختار باقة شهرية وبتكمّل بنفس المتجر ونفس الرابط ونفس الزبائن. هاي الباقات الحالية:

وإذا ما جدّدت، المتجر بيوقف يظهر للزبائن لحتى تشترك، ومنتجاتك وطلباتك بتضل محفوظة ما بتنمسح. يعني فيك ترجع بأي وقت من حيث وقفت.

متجر ولا صفحة فيسبوك خلال التجربة؟

ما لازم تختار. صفحتك على فيسبوك وإنستغرام بتضل الواجهة اللي بيشوفك فيها الناس، والمتجر هو المكان اللي بيكمّلوا فيه الشراء. الفرق إنو بالمتجر:

• كل منتج إله رابط، سعره مكتوب، ومقاساته وألوانه واضحة.
• الطلب بيوصلك مرتّب بالاسم والعنوان وطريقة الدفع، مو بين الرسائل.
• الكمية بتنخصم لحالها، والصنف اللي خلص بيبان «غير متوفّر».
• الزبون بيتابع طلبه برقم جواله بدل ما يسألك كل ساعة.

ليش ما في متجر «مجاني للأبد»؟

لأن المتجر المجاني للأبد عادةً بيكون ناقص: ميزات مقفولة، أو حدود بتوقفك بأسوأ وقت. فضّلنا نعطيك المتجر كامل ٦ أشهر، وبعدها سعر شهري واضح. وإذا بدك تعرف شو لازم تجهّز قبل التسجيل، اقرأ دليل إنشاء متجر إلكتروني، ولتبلّش البيع صح اقرأ دليل البيع أونلاين في سوريا.